禮拜三谷戰用B跑道作賽，天文台預測會有一兩陣雨，不過對場地影響有限，估計掛牌為好地。睇番最近3月16日同一移欄賽事，逾半數頭馬守前四位建功，其中「海之濤」、「沙角威龍」及「及時取勝」更加放頭入直路帶到返終點，可見前置馬仍然佔優，後追馬要像「八運」及「永神駒」有快步速幫助劣勢才稍減。今戰列陣馬中，尾場「及時取勝」上仗正是於3月16日谷B欄贏馬，勝後等番同一移欄再上陣，有機會成為今季首匹五捷馬。另外，七場「勇創潮流」九次角逐谷B欄一哩獲兩冠三亞逾半入Q，今次重返強項隨時可以回復表現。