電視廣播（511，TVB）主要股東陳國強舊年初成為公司主席，即刻加自己人工一倍！且慢，根據公司最新年報，雖然「殼王」陳國強舊年年薪加一倍，實際金額只得75萬元啫，唔係大數目，其實佢作為電視廣播主要股東，又點會志在人工吖。
同樣係舊年升做行政總裁嘅李寶安，舊年年薪就輕微增加4%，袋930萬元。其實佢有得加都算係咁，TVB舊年主業首次見紅，更預告今年經營環境更差，其中一個原因係ViuTV本月推出服務，李寶安都要落力諗計力挽狂瀾。
老實講，華華好耐冇睇大台節目，唔知有乜劇集，翻閱年報，TVB就話，舊年收視最高嘅劇集係由田蕊妮與胡定欣主演嘅靈異愛情喜劇《鬼同你OT》，錄得平均29.2綜合收視點，較2014年大熱嘅《使徒行者》跌0.8個收視點。