最近政圈熱論政務司司長林鄭月娥喺訪問中談到梁班子猶如「雜牌軍」，部份人喺上任前，自己只係見過對方張相咋！嗱，到底雜牌軍係包括邊幾位？唔少人即刻諗起教育局局長吳克儉，箇中原因相信毋須八方再花筆墨說明。
咁，把口生喺人哋度噃，噚日有傳媒喺「動˙樂活生命！」運動嘉年華開幕禮見到吳得掂，梗係問吓當事人，係咪榜上有名？畀佢有個回應機會嘛！
可能吳得掂都唔知自己掂唔掂，當有傳媒問到，佢認為自己係咪林鄭口中埋班後先識嘅局長時，只係話成個班子一心、齊心為香港服務，呢個係不爭嘅事實，仲話大家合作無間、互相支持、互相配合。注意，吳得掂回應時候冇乜點眨眼囉，功力好深厚啊！