有留意今年美國總統選舉嘅人應該知道，美國總統奧巴馬與共和黨總統參選人特朗普近期經常針鋒相對，言語上互不相讓。不過，講起兩人自傳嘅受歡迎程度，奧巴馬今次就真係輸畀特朗普。
根據美國白宮最新公佈奧巴馬與妻子米歇爾嘅2015年稅單，美國第一家庭舊年收入唔到44萬美元（343.2萬港元），係奧巴馬2009年上任以來最低年收入。
點解？因為佢啲傳記唔賣得囉！奧巴馬2009年第一次當選總統時，佢嘅自傳《我父親的夢想》與《無畏的希望》曾經為佢帶嚟500幾萬美元嘅版權收入。但據佢舊年嘅稅單，呢兩本傳記舊年只為佢帶嚟約6萬美元收入。
另一邊廂，特朗普喺1987年出版嘅第一本自傳《交易的藝術》好熱賣，正霸佔亞馬遜暢銷榜一席位。特朗普又有嘢可以攞嚟牙擦擦！