日本熊本縣喺上周四晚同上周六凌晨發生兩次大地震，造成至少41人同逾3,000人受傷，以及引致塌樓、塌橋同埋山泥傾瀉。日本體育界亦出一分力，其中日本職業聯賽就成立咗「熊本大地震賑災基金」，多間球會都幫手進行募捐活動，幫災民籌款重建家園。
今輪日聯、日乙同埋日丙總共有六場比賽因熊本發生兩次大地震而取消咗，當中包括京都不死鳥迎戰熊本羅亞素嘅日乙賽事；而喺如期上演嘅比賽，球員同球迷都同熊本心連心，其中喺FC東京主場對川崎前鋒場日聯，球迷就掛起寫有「熊本加油！YNWA（You'll Never Walk Alone）！」嘅橫額，精神上支持熊本嘅災民。
佐藤美希連日籌款
至於一啲球會包括浦和紅鑽、福岡黃蜂、大宮松鼠同埋FC東京等都派出職球員喺街上籌款，FC東京暫時已經籌到270萬日圓（約19萬港元）左右嘅善款；而本身係日聯特命經理人嘅佐藤美希仲連踩兩日，前日同噚日分別去咗日聯球會湘南比馬同埋日丙球會盛岡仙鶴嘅主場幫手籌款。
除咗日本嘅足球會之外，日本職棒都有為災民送暖，其中東北樂天金鷲就捐咗200萬日圓。
