100%純、真、堅，唔合拍，做自己的港產片，我一周內看了三齣：《選老頂》、《樹大招風》及《老笠》。
港產片好像很久沒試過這麼熱鬧。《十年》拿到金像獎最佳電影，有影圈老pat pat未睇過套戲但爭住發表偉論剃自己條眉；又有母語係火星文的議員話佢期待係科幻片，但見唔到學生踩roller返學。呢台戲好睇過《十年》。《十年》其實係一塊照妖鏡。
入番正題，《十年》或多或少引發大家再次留意港產片，呢個星期有三套你揀。《選老頂》最早上映，以選黑幫話事人明喻特首選舉，好出面的。幕後話事人黃秋生一直操控那個後來變成一人一票的選舉遊戲，欖炒乃必然。玩政治笑話，手法不算高章，略嫌畫公仔畫出五臟六腑。而且有些人物有安插成份，有些枝節有橫生成份。但肯拍呢個題材的確有guts，在這個時代，我們都窮得只剩下guts。導演邱禮濤有種大俠風範，值得支持，但期望呢家嘢，留番喺屋企，唔好帶入場。
《樹大招風》，唔睇唔得，因為我睇到港產片的希望。做賊做到可以稱王，真係不同凡響。葉繼歡、張子強、季炳雄，一部電影串起三大賊王，好癲，呢三個人好癲，但更癲嘅係片中的大陸高官，大爺式貪污，比起明刀明槍搵命搏打劫更讓人咬牙切齒。入唔到大陸就肯肯定嘅，但杜琪峯願意讓三位新導演：許學文、歐文傑、黃偉傑去試，他們也交出成績，敢講甚至比杜導近年作品更有神采及朝氣。三人各執導演筒，平行發展，但又交錯得啱啱好，完全看不出是分開拍攝，非常一氣呵成。任賢齊逼黃光亮接贓具霸氣；陳小春張狂而不誇張；林家棟的狠毒令人寒到要着衫，配角如林雪、尹揚明都演得好。結局令香港人好神傷。97年之前，香港曾經被呢班大賊玩謝，他們是金行、富商的惡夢。但依家的香港其實比當年更惡夢，因為有人合法地打劫小市民荷包，然後還有警察保護。
我會說《老笠》好清新。唔係影片風格，係視野，係手法。宣傳語話「我哋個城市塞L住咗」，中到應一應。唔上唔落，唔出唔入，正是香港寫照。一晚，一間便利店，一個廢青，一個賤嘴老闆，一個釋囚，一個癲警，再加一個個亂入喪人，一段港式哀歌，不過結局似乎幾有希望。馮淬帆的忽然撻着，繼而老笠，狂爆金句，實在有型。值得一提嘅係，三套戲都有姜皓文，呢個綠葉王在《老笠》尤其搶鏡。劇情異常荒誕，殺戮中途，不忘照顧細路，好溫馨。識玩首尾呼應，有埋伏線，結局估你唔到，爆過爆炸糖。如果開頭刪減無聊位，拉番勻更好，現在有點頭輕尾重。
人人有段古，細緻有笑位，好耐無睇過咁爽的港產片，尤其後段隱藏了很多message，堅有嘢逼你諗。做人，最緊要仲會痛！
港產片，識得睇，其實好好睇！
記者：葉青霞
