講到梁班子現時民望最高企嘅官員，肯定係打住本土旗幟而獲爆like嘅財政司司長曾俊華。雖然佢成日話下屆唔選特首，但見佢蠢蠢欲動，facebook同網誌玩不停，力爭港人芳心，又難免令政界中人覺得時機未到箒。
噚日鬍鬚曾又出招，po咗高中時代冇鬍鬚嘅學生照，借故提及重視公平競爭係香港嘅核心價值，相信籠絡唔少反特權689市民嘅歡心。
網民話似少爺占
鬍鬚曾繼續喺網誌想當年，一張無咗招牌鬍鬚嘅學生相，瞬即喺網絡瘋傳，有網民讚佢斯斯文文好gentleman，有人更話佢似商台嘅少爺占，但八方就覺得唔多似喎。之不過，張相只係引子嚟箒。
鬍鬚曾查實係想藉憶述美國母校史岱文森高中（Stuyvesant High School）當年收生機制，對五湖四海、無論白人、黑人抑或亞洲移民嘅學生，提供嘅學習同表現機會都均等，個人成就唔會因為不同種族、背景或文化獲不同對待，同樣可以喺公平嘅平台上表現自己。
鬍鬚曾仲話，呢個機制表明呢種「互相尊重」嘅價值觀，明確演繹咗「英雄莫問出處」嘅中國老話。
而佢作為嚟自香港嘅新移民學生，對呢種價值感受甚深，覺得母校嘅優良傳統，「（與香港）重視公平競爭，任何人不論背景都有機會發展所長的核心價值，實在有很大的共通性」。力撐公平競爭，港人又點會唔冧呢？
李八方
mailto:[email protected]