特首女「行李門」事件越演越烈，噚日有近2,500人因為此事到機場靜坐，場面都幾震撼，咁喺呢個日子，事件主角之一嘅梁特首又去咗邊度呢？原來佢係去咗深圳睇廠，認真估佢唔到！
綜合注塑解決方案供應商東江控股（2283）噚晚出新聞稿，指梁振英與創新及科技局局長楊偉雄，噚日去咗佢哋位於深圳東江科技工業園，參觀智能模具與注塑生產線，目的係了解「優秀港資」喺高新技術嘅發展。
呢隻東江控股市值唔夠18億元，相對上星期爆紅嘅「翠如BB股」聯旺（8217）有成107億元市值，東江肯定係奀豬豬，點解吸引到梁特去睇廠呢？除咗佢夠優秀之外，應該就係同香港工業總會拉線有關嘞，成個行程由工總安排，而東江主席李沛良亦係工總前選聘理事。
唔知東江得到梁特加持，會否得股民垂青？