早前嘅禁止帶大型樂器風波搞到港鐵好頭痕，但港鐵查實不時推動藝術，噚日下晝請咗世界級小提琴家Joshua Bell喺中環站內演出。Joshua Bell曾經喺三任美國總統同埋前國家主席江澤民面前演出，可謂神級小提琴家，最令人嘖嘖稱奇嘅事係試過於華盛頓地鐵匿名演奏，成為網上紅人。點解無啦啦會到港鐵？原來係由港鐵主席馬時亨穿針引線。
肥馬話早前知道Joshua Bell本月來港演出，透過朋友嘗試聯絡，邀請對方到港鐵一展身手，估唔到對方答應，噚日演出長達廿分鐘，令在場人士聽出耳油。最令肥馬感動嘅係，對方噚晚有演奏會都肯幫手。