新一輯《廉政行動》本周六出街，今年剛好係廉署電視劇播映40周年，廉署搞搞新意思，今輯以一隊廉署調查人員為故事骨幹，接唔同貪污案，以連續劇形式播映，有別於以往每集以單元劇講一宗貪污案，今次搵咗導演邱禮濤負責整輯拍攝，同時會加插調查員嘅私人生活點滴，例如有調查主任被診斷患癌、有已婚調查員被派做卧底等，兼且有從未曝過光嘅廉署訓練學校。
今輯共講述7宗貪污案，由路試考生賄賂考牌官，以至上市公司詐騙案都有，其中「阿旦」鄭丹瑞飾演嘅區議會候選人賄選案打頭陣，劇中阿旦走灰色地帶，透過成立居民合作社及免費款待拉攏街坊，又搵車接送佢哋投票，但冇開口要求街坊選佢，只係打心理戰，用花言巧語誘使選民選佢，但最終被廉署落案起訴。節目本周六起一連5星期，晚上8點半喺無綫翡翠台播映。