昨日講及「中大出版社」嘅新書，夏濟安翻譯「美國名家散文選讀」，放在辦公室枱面。點知大記者去FCC午餐會聽完中聯辦王振民大教授講中國民主進程與法律之後，聽到一肚氣，走上嚟搵左丁山打牙骹，一睇到夏濟安本書就拎起，翻讀一番，見到內有一篇係傑佛遜嘅大作Education for Democracy，立即話要詳讀，首先係讀中文，因為夏濟安嘅中文翻譯實在流暢易讀，左丁山笑佢：「咁你仲識唔識英文㗎？」大記者不理，話要借走本書，咁就揚長而去。
此文章其實係講如何推廣民眾教育，學生中小學要修讀甚麼學科等等。美國立國初期，要民眾尊重憲法，遵守憲法，要從普及教育入手，沒有教育的民眾，幾難遵守民主程序，捍衞民主制度，呢啲事情我地在亞洲國家見得多咯。
21世紀美國嘅教育當然唔再需要宣揚民主生活方式及民主程序，因為人人都對民主選舉制度深信不疑，隨時引用憲法條文與聯邦政府對抗，就算今年選咗莽夫特朗普出嚟做總統，美國制度都唔會失控，反而可以局限「特朗普總統」做唔到儍事，如沿着墨西哥邊境興建圍牆。美國今天教育嘅大辯論就係如何為大學畢業生搵工，如何減少學生選讀文史哲新聞（有人冇工做），多讀工程科技及專業（有工冇人做），換言之，多讀職業課程，某些州立大學直情受到州政府撥款威脅，要殺人文學系，增撥資源俾理工學系。唔知點解，美國中小學學生嘅數學特別水皮，每次考OECD嘅PISA測驗，美國學生嘅數學得分都在世界平均線，或甚至低一啲，難與上海、芬蘭、香港、新加坡學生相比。數學唔得，就入唔到大學攻讀STEM科目，令美國人嘅世界競爭力降低晒！
一位美國教育界教授趁來港之便，順道考察香港學生考PISA點解可以名列全球前四、前五名咁巴閉，去咗一間老牌名校觀察，驚異於香港學生咁犀利。其實如果佢能夠真係深入民間，就應該去睇吓地區名校點樣嚴格操練本地學生做功課，做測驗，邊會學似老牌名校學生咁輕鬆，唱歌練琴跑田徑呀！地區名校啲老師知道田二少在立法會要求小學零功課，一定暗自偷笑；二少未免係堅離地，不知地區學校學生疾苦也！如果人人都好似田二少咁好背景，讀書係拔萃─康奈爾─哈佛MBA嘅話，一天都光晒啦。