唔少港腳𠵱家都喺國內球壇搵食，前鋒高梵亦係其中之一，佢喺上周六成為今季中甲第一位入波嘅香港球員，完場前絕殺協助主隊青島黃海主場以2:1險勝浙江毅騰。黃海喺完半場前先開紀錄，但易邊後冇耐就被扳平，踢到83分鐘，一輪門前混戰之後，主隊把握到對手解圍失誤，高梵轉身抽射破網奠勝。另一位港腳李志豪同日中甲亦有上陣，雖然冇波入，但佢效力隊波梅州客家就大獲全勝，主場6:0大破湖南湘濤。