上星期五係希斯堡慘劇27周年，利物浦喺晏菲路球場舉行悼念儀式，約2.2萬名球迷入場。喺領隊高路普同埋隊長佐敦軒達臣帶領下，全體職球員着黑西裝到場，前領隊羅渣士、鶴臣同杜格利殊亦都有嚟。
儀式長約兩個鐘，喺最後，希斯堡死難者家屬團體嘅主席希斯發言，希望曼聯同利物浦球迷互相尊重，唔好拎對方嘅慘劇嚟開玩笑，「利物浦同曼聯係宿敵，但我哋都認同，唔應該拎一件災難去侮辱對方。我一直都話，我尊重慕尼黑空難事件，我尊重其他球隊嘅球迷。你可以充滿激情，但面對慘劇，大家應該團結一致。」喺早前利物浦對曼聯嘅歐霸盃比賽，雙方球迷分別拎希斯堡慘劇同慕尼黑空難嚟侮辱對方，賽後仲大打出手。希斯堡慘劇喺1989年4月15號發生，當時有96名利物浦球迷遇難。另外，今年會係利物浦最後一次為希斯堡慘劇舉行大型紀念活動，希望死難者家屬可以釋懷。