雷神畢竟係贏馬機器！這天第八場三班草地1200米，呢位神級騎師贏大熱門蔡約翰馬房的「紅衣醒神」，個人連同第二場「佳龍駒」及第四場「有禮」兩Win，雷神率先中三元，賽後以48分拋離所有對手，提早勝出騎師王。
「紅衣醒神」造就蔡約翰連續第二次賽事有馬贏，雷神這天三Win清一色係頂頭大熱，不過「佳龍駒」及「有禮」都唔夠「紅衣醒神」熱，呢匹三歲馬只得1.9倍獨贏，組合獨贏A1則派14元正，但19元Win的派彩，唔夠買驚風散，「紅衣醒神」全程外叠蝕位，直至觸線一刻，才短馬頭位僅僅趕過亞軍「快無極」，差啲輸埋。
「紅衣醒神」本身累積四戰三冠一亞未甩過Q，3歲馬前景可謂一片光明。同人唔同命，女將蔣嘉琦繼第六場「海嵐一號」屈居亞軍後，今場佢接手新勝馬徐廐「快無極」拼盡都係第二，未能為此駒連捷。
今場兩匹有飛初出生力軍，當中「綠勇士」及「按得澄」分別由韋達及潘頓跑第三同第四，四重彩派1,435元，係暫時最奀一場。