想買樓？首先你要好有錢。近日將軍澳一個臨海新盤在淡市下大賣，其中一位買家就用三年時間儲100萬首期。他是如何做到？首先，你要有可觀收入，每個月扣晒所有使費，平均儲蓄連同投資回報要有兩萬七千幾；然後，就是揀個有錢兼唔大使的男/女朋友，同你一齊搵錢儲錢；再唔係，可以參考小弟某位朋友問阿媽攞首期買樓。另一重點就係唔可以咁大使，否則金錢左袋入右袋出，又點會剩到錢？
近期二手樓價係咁跌，資助房屋如煥然壹居和新居屋等銷情未如理想，部份一手樓更是越減價銷情就越差。二手樓可以靠平出線；但新盤要突圍而出，關鍵唔係樓盤質素，而是劈價、稅項補貼，加上付款辦法、免息前期貸款及餘額貸款等招數，不過這些招數拉長了資金回籠期，被某電視節目形容為「接近以本傷人」。有資深地產代理形容，某樓盤的付款辦法夠靈活，一招「先住後付」，頭20個月唔使供樓，換樓客可以放心購買，財務彈性較大，減低新舊樓一齊供的風險，就是樓盤熱賣的關鍵。財務安排夠靈活，蓋過了樓盤本身的缺陷，也是「有錢就是任性」的表現。
近日醜聞纏身嘅馮氏夫婦，利用公務員的按揭福利作為跳板買樓，加上他們多年來的炒樓心得，與富商建立人脈的手法，透過不同方式（包括樓換樓），賺取數以億元計的資產，絕對是普羅市民置業創富的「榜樣」。假如政府將來要教人妥善理財，做好個人退休保障，馮氏夫婦的心得應該成為重點教材。
地產小子
http://propertykids.blogspot.hk/