家庭成員少，家居設計較容易處理，但成員多考慮需要多，設計上可以非常複雜棘手。單是空間運用已經殊不簡單，客飯廳全家聚首食飯睇電視，最起碼要夠位坐，還有收納大量日用品、雜物及鞋履等，該如何處理？
記者：溫潤潔
攝影：張志華
一言以蔽之，客飯廳不能太細，如果先天不足，就要靠後天改動。單位原則呂字廳，廚房夾正中，三區侷促不討好，廚房來個拆牆「擴空大法」，三區相連貫通，視覺上睇得透，再無拘束，真的鬆動了。
飯廳設曲尺形卡座
為了更慳位，訂做家具全部貼牆放，飯廳訂做曲尺形卡座，坐得更多人，底部備貯物功能。卡座對面做曲尺形通頂櫃，體積巨大，隨你喜歡放鞋、雨傘、藥箱或吸塵機等，收納量有多無少，滿足所求。這組大櫃留位掛電視，與卡座相距5呎，方便全家睇電視食飯。此舉亦可令飯廳當偏廳用，若父母與兒媳想睇不同電視台，喜好不同，大可分流到客廳睇另一部電視，無爭拗，體貼的設計莫過於此。
單位有三間房，五人恰好夠分配，但每間房有限大，上天下地用到盡。父母及兒媳房做地台，床尾做衣櫃，僅餘通道因應闊窄不同，一間做書枱，一間做床頭几及薄身飾櫃。細仔房做組合家具，有齊書枱、書櫃、衣櫃及高架床等，實用功能多。此外，三間房門邊天花亦不放過，全部做吊櫃，高高在上，出入不頂頭，亦不阻礙通道，如此貯物「高招」，應記一功。
黑白色顯時尚感
客飯廳及廚房相通，以顏色作分區，客廳電視背及梳化後鋪白色文化石，素淡得來有質感，側旁一壁髹黃色油漆，加添暖意，切合五口之家樂融融氣氛。飯廳做巨型貯物櫃要避重就輕，全組是白色，但又怕悶，櫃門做凹凸橫條效果。飯廳卡座經常坐要耐用，做黑色座墊，背後牆身鋪木紋膠板可防撞刮花。廚房做白色吊櫃、黑色地櫃，中間牆身鋪不銹鋼，富現代時尚家居氣息。
三間房做木家具，但色調深淺不一，年長的父母房喜歡偏灰色薰衣草木，兒媳鍾意較和暖的啡色木，細仔愛淺木拼褐色有對比，各有所屬，自有天地。
物業：黃大仙翠竹花園
面積：591方呎
家庭人數：5人
設計及裝修：Castle Design House（9804 4449）
歡迎讀者提供單位拍攝及介紹，請將資料傳真2370 3886或
電郵mailto:[email protected]