喺NBA比賽，教練見到隊波唔太掂，可以叫個暫停回吓氣，但足球有冇呢支歌仔唱呢？可能就要球迷幫吓手。上星期五法甲，里昂主場對尼斯，佢哋喺17分鐘被對手謝明開紀錄，25分鐘仲有哥尼特被逐。踢少個兼落後一球，里昂當時形勢真係好差吓，去到70分鐘，可能主場球迷唔滿意球隊表現，一齊掟廢紙入場，搞到成地紙。球證暫停比賽，工作人員拎齊帚把同鏟入場清理，里昂門將安東尼盧比斯都有幫手。執完紙之後，比賽重開，里昂喺82分鐘靠拿卡錫迪建功，逼和1:1完場，搶到一分。