由囍帖街走到山林道，要幾耐？由《姿色份子》唱到大熱嘅《囍帖街》，再到2016年嘅《山林道》，Kay BB就用咗十年時間，遊歷呢段旅程。今年係謝安琪「出道十年祭」，除咗有《拾回 謝安琪》演唱會賀一賀之外，最令人難忘嘅，一定係近期熱播嘅《山林道》呢首歌。
記者：梁智威、陳家文
攝影：馮鋒、陳家文
《山林道》MV入面，邀請咗9位不斷為自己、為別人栽種快樂嘅香港人參與其中。當中每一位，都喺各自嘅山林之間，搵到屬於自己嘅大道。而今日嘅主角BonBon，就係其中之一。
22歲，演藝學生，街頭演唱，聽落好順理成章，但BonBon就係有一份唔同，就係喺佢聲線與笑容之間流露嘅感染力。話說BonBon之所以喜歡街頭演唱，就係希望透過歌聲去感染過路人，希望繁忙嘅香港人能夠放慢腳步，聽聽就在你我他身邊響起嘅杳杳歌聲，甚至有路人試過流下一滴眼淚。
BonBon自比為鬧市中的一顆小齒輪，亦希望這一顆小齒輪能轉動大齒輪，為別人帶來快樂、帶來啟發、或者帶來點點反思。小小年紀，又可以畀到人乜嘢啟發？原來BonBon走過嘅路亦有顛簸，亦有試過迷路，曾經諗過退學、曾經自覺廢柴、更曾經諗過自我解脫，但一醒覺，終於領悟「劈下樹開山兩次，由無路變吋吋慢慢移」嘅鬥志，搵返自己嘅路。
行文之日，收到噩耗，再有同學仔離開呢個世界。謹以此曲寄語天下年輕人，「要實現當天壯語，沿途活得相當有意義」，對，要活著，先至會有意義。
**感謝阿Kay喺演唱會排練期間，帶住疲累嘅身軀，都為片段獨白加持，祝今晚演唱會成功。
謝安琪 Kay Tse 《山林道》 Official MV - 官方完整版：
https://youtu.be/qqqFoC6nZ8k
繼續留意【我的《山林道》】系列，繼續尋訪山林之間嘅香港人