澳職季後賽開打，周五上演首場淘汰圈賽事，布里斯班獅吼（橙衫）主場迎戰衞冕嘅墨爾本勝利，不過唔講仲以為呢度係勝利地頭，後者成個上半場到下半場中段都一直佔盡優勢，相反獅吼要踢到60幾分鐘先出現第一次射門。踢到78分鐘勝利守將謝利亞領第二面黃牌被逐，踢少個反而由貝利沙喺86分鐘先開紀錄。不過好戲在後頭，獅吼喺88分鐘同埋補時連入兩球，戲劇性反勝2:1晉級四強，將會對西悉尼流浪者。