特首梁振英女兒行李「特事特辦」，真的是「機場有情」。
前兩日由香港返台灣，在離境大堂檢查證件處，送上護照及機票給一位身材豐滿的女職員。沒有故意擰歪面，沒有東張西望，沒有眈天望地。她突然開聲：「喂！你望過嚟我呢邊啦！」四目相投，看到肥嘟嘟的臉龐，殺氣冇嘅，不過有夠黑。
同意她要核對證件相片甚麼的，但使唔使咁惡死呀又？
入到禁區，發現包紅萬不見了，不是留在禁區外，而是忘了帶。習慣性走去小的煙酒店買，貪佢清靜無人，也算是支持小店。瘦削的女職員遞上一條紅萬，想即場拿一包出來。正在找尋撕裂口，真的只五硂六秒左右。她說：「先生，你出去搣啦！呢度唔准搣嘅！」四目相投，看到瘦小的臉龐，殺氣冇嘅，不過有夠冷酷。
同意不應該因搣嘢，阻礙別的客人埋單，但全店只有我們兩人呀！使唔使咁無情呀又？
都冇話一肚火嘅，而係有啲hurt。被肥的呼喝完，瘦的又趕你出店。上到飛機，最近例牌一樣，在停機坪一等就是一個多小時。贊成起三跑，快啲。
回到台灣。香港來的同事說沒有「肥瘦雙姝」類似遭遇，但不覺得意外，但台灣同事個個張大口齊說：「不可思議。」老總小馬說，他相信台灣人會是這樣，肥姝會說：「先生，你可以看過來我這邊一下下嗎！因為我要核對一下護照。」然後四目相投，你會見到笑臉。瘦姝會說：「先生，你想撕開煙盒嗎？我可以幫你嗎？」
後記
老婆去日本旅行，與同行友人找旅遊書上的鰻魚飯店。去到發覺該店當天休息。正在不知所措，一位日本師奶主動上前問有甚麼可以幫忙。然後師奶就帶着師奶去了警視廳。做乜？由警察上網找尋附近好食又好味的鰻魚飯店。
逢周六刊出
葉一堅
mailto:[email protected]