一位讀者自稱阿陳來電郵云：「多年勞碌，為搵食，想穩定下來後，回大學，修讀當代中國歷史，目標：弄清楚1911至80年代中國情況，請指示。」
指示就唔敢，不過近年有好幾位朋友退休後，到中文大學攻讀比較歷史碩士，讀得好開心，吳明林、黃遠輝已經畢晒業，大力推薦，大編輯仍然兼職讀緊，大概今年可以畢業。阿陳如要讀當代中國歷史，申請中大呢個碩士課程，應該係一個好選擇，至於可唔可以弄清楚1911至1980年代中國情況，就要睇你選到邊一科。大編輯就有選修一科「民國史」（1911-1949），1949之後唔教。以左丁山愚見，1949之前我地比較陌生，上課跟老師係好啲嘅，蔣介石日記在史丹福大學胡佛研究所公開俾學者研讀之後，內地與台灣又公開咗一啲國民黨政府檔案，「新史料」湧現，自己去自修，恐怕不得其法，如有正規上課，有教授點路，會了解得多。至於1949至1980甚或2015，普通人目前大可閱讀大學出版啲個別事件書籍，例如三反五反、大躍進、文化大革命等題目，已有大量專書出版，中大出版社出咗不少好書，讀下不同版本，可知大概。
讀歷史，在香港讀，可能有啲優勢。最近明報星期日版訪問一位中國社會科學院博士周先生，佢因為「不姓黨」，已退出中社科院，原因係內地學術研究自由有限制，國家（由黨委書記監控、傳話）要求研究若干題目，自有框框，唔聽話嘅，就長坐冷板凳，肯姓黨嘅就成為「學術紅人」，研究觀點當然就係馬克斯史觀，維護黨的威信，故此有一啲學者搵機會投身海外，追求自己有真正興趣及不作違心論嘅題目。到內地大學讀中國歷史，尤其是現代史，有好多嘢要妥協嘅。
講番退休人士想入中大攻讀比較歷史碩士，亦未必一定得，因傳開咗之後，聽講每年有幾百人申請入學，成為中大最受歡迎一個碩士課程，因是之故，入學比率並不高，要睇幾多因素㗎。
香港中學生對讀歷史就冇興趣，幾乎係人見人怕，但入到社會做事，甚至到達退休年齡，又覺得唔識歷史係一件憾事。其實唔識中國歷史嘅話，與中國企業、中國各級政府機關交手，零舍吃虧。要做跨國銀行中國區行長，跨國公司大中華區CEO，剩係識得MBA管理學，唔識三國演義與孫子兵法，撞頭埋牆都未知係甚麼原因。