澳洲賽馬新聞網站punters.com.au最近選出自2010年以嚟，澳洲馬壇十大「投注毒藥」，當中來港服役後兩戰得一冠一亞，將於周六(1日)再出，爭第10場二班草地1200米嘅「華盛高飛」居然榜上有名，喺毒藥榜排第7位。
點解「華盛高飛」會入選呢？原來佢澳洲跑過6場，由2.6至7.5倍，結果只得2亞1季，出親次次有飛，其中三次更係大熱，但冇次取勝，唔怪得令當地馬迷眼冤。
但世事無絕對，「華盛高飛」運港服役，一出3.7倍喺田草直路賽贏馬，上場增程上1200米，5.5倍表現亦唔失禮，喺內疊衝只輸畀「幸運年年」獲亞軍，相信喺香港馬迷心目中，「華盛高飛」絕非唔係「投注毒藥」。
記者將呢單新聞話畀練馬師蘇保羅知，佢就話：「『華盛高飛』上手馬主同練馬師睇得太高，幾乎每次出賽都跑三級賽或表列賽，跑得級際賽，要贏自然難度大增，何況隻馬當時未成熟，有3次上名紀錄已唔錯。」
蘇保羅又話「華盛高飛」來港後先至踏入成熟期，狀態越戰越勇，今場繼續睇好牠，認為排6檔只話出閘夠快，稍為留住，便可再入三甲甚至贏埋。