衞理中學校長藍正思協助一名去錯試場的DSE考生尋找鄰近考場、幫助截的士和借$500付車資的事跡，獲不少人激讚。藍正思接受《蘋果》查詢時指，沒預計該女生將事件於上網公佈，對女生最終僅遲10分鐘到達考場感到高興，「佢話做得晒，仲有5分鐘剩，考到個試我同佢都好開心」。藍指，當初得悉女生要趕往考場，曾考慮直接駕車載她到達，「但驚揸錯路，始終的士司機最熟」，幸好校門對面馬路有的士正等候轉燈，終成功上車，他事後亦返查網上地圖，預計他遲到不多於10分鐘，「反而驚係佢心情有影響，不過佢一上車都同我揮手，我都好安心」。
藍正思形容該女生「好乖」，考完試即立即回衛理中學還錢，「佢返嚟同我傾計，我更加安心」。藍續稱，這件事對校長老師並非偉大，但對該女生來說卻很重要，「因為今科考得好唔好，會影響佢心情，對佢成長嚟講都好好嘅經歷，返唔返嚟多謝我唔緊要，但今日有人幫過佢，佢第日都會幫人，呢個對佢係好嘅經驗」。
藍指，女生得悉要返回原有考場蘇浙公學應考時，藍建議她乘的士，該女生卻說：「咁唔考嘞」，查問下才知原來她現金不足，藍及後借錢予她乘的士。這事件亦讓藍有所反思，「其實佢都好努力，點解佢會放棄，但佢身上無錢，諗唔到處理方法，好多年青人可能都係咁，有一刻想放棄覺得無方法處理到，其實喺側邊有人畀少少幫助佢就跨過到」。