噚日係仁愛堂第37屆就職典禮，新任董事局主席鄧錦雄上台致辭話，今年8月會搞個「仁愛堂綠色絲路探索之旅」，話要帶30個高中學生去「一帶一路」嘅地方，仲會喺庫爾勒沙漠露營，希望佢哋學習下沙漠氣候轉變同全球氣候問題，返嚟香港再向公眾宣傳環保意識。成個旅程大概十日，由烏魯木齊出發，會去克拉瑪依油田、中國科學院新疆生態與地理研究所等地方考察，仲會有隨團醫生全程睇住。
仁愛堂嘅對外事務經理同八方講，成個項目經費數目都唔細，仲會全數資助參加嘅學生。𠵱家香港中國企業協會已經贊助咗逾十萬畀仁愛堂，不過目前就仲籌緊錢。