黃秋生早前接受訪問，自認有「海膽樣」，其實口硬心軟，《蘋果動新聞》日前邀請他做「人人問秋生」環節，開始前秋生先旨聲明：「成日做到我形象唔答你哋啲問題，我今日就答晒你啲問題，只係唔答啲蠢問題。」全程答得爽快，有讀者提到王晶，秋生拒直呼其名，只抵死說：「嗰個王三日。」另外，秋生又提到自己年輕年代最鍾意趁lunch time去游水：「我係邊食住lunch邊游水嘅。」
採訪：楊定、譚倩宜
Q1.黃小姐：秋生你鍾唔鍾意游水，平時會唔會喺lunch time去游水？
黃秋生：我好鍾意游水，年輕年代係差唔多逃學去游水。Lunch time游水我會嘅，喺我哋嗰個年代，我係邊食住lunch邊游水嘅，擺個盤喺度，可樂呀、漢堡包呀、薯條呀，一路食一路游。
Q2.陳先生：如果你要分別問周潤發、梁振英同王晶一個問題，你會分別問啲乜嘢呢？
黃秋生：發哥我就想問，點解你咁多年都可以咁和藹可親。梁振英……err……我冇諗過問佢乜嘢問題喎，因為佢唔會答我。嗰個王三日呀，我冇興趣問佢問題。
Q3.麥先生：你從影以嚟最鍾意邊一個角色，點解呀？
黃秋生：《葉問：終極一戰》裏面嘅葉師父嘞，因為我花咗一年時間去研究呢個角色，不過好可惜，現金又冇，獎又冇，覺得做得好嘅嘢係冇用，我覺得做得唔好嘅可能會攞獎。不過𠵱家事實都係咁樣，做得唔好嘅反而攞影帝影后，講笑啫。
Q4.黎小姐：你點樣評價近年嘅男女新演員呢？
黃秋生：演員睇對眼已經知，睇幾個鏡頭，已經知呢個演員得嘅，新演員就白只啦，其實我唔係好識邊啲新演員。
Q5.張小姐：如果你要用一啲詞語去形容自己，你會用乜嘢詞語呀？
黃秋生：黑口黑面、招招積積、沙塵白霍，再精準啲要講粗口㗎喇。
Q6.岑小姐：如果你有權決定196億嘅用途，你會點樣用呢？
黃秋生：嘩！196億，我梗係買樓啦！哈哈，你都黐線嘅，再買隻遊艇㖭呀，196億可以買一架私人飛機，我仲使做？起個劇場畀自己。
Q7.丘先生：如果當初你冇做演員，你𠵱家會做緊啲乜嘢？
黃秋生：我𠵱家可能性有兩種職業，一種叫監犯，一種叫精神病患，得人驚呢，我黐起上嚟，我自己都驚呀。
Q8.鄉先生：秋生，我想問你覺得在職人士使唔使學簡體字？
黃秋生：睇你做緊咩啦，咁我飛機師嚟，學簡體字做乜嘢呢？你最多話我學兩句普通話，各位乘客現在撞機啦，冇理由需要學簡體字。
Q9.徐先生：秋生呀，你覺得你同陶傑似唔似樣呀？
黃秋生：有啲似㗎，尤其我水腫嘅時候。細個嗰陣，有幅相係好似樣，點解我會同佢似樣㗎呢？冇理由，點睇都唔似一個咁有智慧嘅人，吓嘩。有陣時，我都覺同佢有啲似樣，我嘅榮幸嚟。
