每朝返工搭地鐵迫到成塊沙甸魚咁，日本嘅情況可能更加嚴重。不過有時真係唔可以唔服日本人啲創意同心思。可能你旅行去大阪或京都時都搭過嘅「京阪電車」，早前就係官方twitter上載咗一段片，介紹咗佢地一款「京阪5000系電車」一個功能， 就係部份座位竟然可以升降，官方形容為「可能係世界上唯一可以升降座位的電車」，唔少日本網民話，雖然成日搭個架電車，但都唔知有呢個功能！
翻查資料，「京阪5000系電車」係1970年開始運作，為咗人多高峰時段可以有效紓緩人潮，所以就有升降座位呢個設計騰空更多企位等更多人可以上車，同時原本每側有3度車門的一個車卡，個時就會增至5度車門，方便乘客進出。不過而家會作為緊急措施，一般情況都唔會用到升降座位，加上睇落如果有畏高嘅坐上去，都咪話唔驚！
資料來源：twitter.com/keihandensha、Yahoo Japan
記者：余瑋