由上水鄉委會主席侯志強同元朗十八鄉鄉委會主席梁福元牽頭籌組嘅「新進步聯盟」，擇日本月25日下午兩點喺荃灣如心酒店舉行成立典禮。
邀小明 梁特 出席成立典禮
分別任正、副主席，以及新東、西召集人嘅侯、梁二人當日獲幾多鄉民撐場，各界梗係好關注，此外，鄉議局主席劉業強會唔會現身，都係可圈可點。
八方聽聞新界黨同時邀請咗中聯辦主任張曉明同特首梁振英出席，佢哋會否亮相，其實都極有含意。如果撐場，即係默許新界人組黨啦，如果冇影，呵呵！新界黨進軍立法會呢場大仗恐怕都唔好睇咯！另外，八方亦好關心，唔知到時成班問責官員，又點企位好呢？
CY同小明到唔到就未知，但侯志強同梁福元嘅組黨工作已七七八八。八方聽聞成立典禮當日會公佈個黨組織架構，但未必會公佈確實參選名單，除咗新界東、西外，新界黨仲有九龍發展部，以證明並唔係只顧及新界人權益，而構思中口號以「凝聚」為主題，相信都係呼籲新界人團結捍衞新界人利益。
據知佢哋仲特別搵專人幫手設計黨徽，八方有機會先睹為快，紅色N字向上，箭嘴下有綠藍色海浪，N字據悉係代表新界同新聯盟，紅色當然示意係愛國愛港陣營啦！
據聞黨徽喻意無畏風雨、勇往直前、乘風破浪，共創香港人精神，相信都係反映緊，被強力部門打壓下嘅組黨心聲。
李八方
mailto:[email protected]