NBA一代球星高比拜仁（Kobe Bryant）於香港時間4月14日早上10:30最後一次代表洛杉機湖人主場迎戰猶他爵士，超過50名香港高比迷晨早去到尖東某餐廳睇波向偶像道別。
呢班高比迷為咗睇呢場賽事，全部攞假著齊湖人波衫撐場，好多仲特登早成個鐘來到食定早餐打底。賽事未開始，但鏡頭一影住高比，全場即時拍手起哄，氣氛相當熱烈。高比今仗打足全場，隊友都有共同目標，不斷製造機會予高比，可惜頭三節皆處於落後形勢，到第四節尾段先來一個大逆轉，完場前反超前對手，全場取得60分之餘，更以一場勝仗為自己NBA球員生涯作結，不少在場睇直播的球迷亦激動落淚，高比總算對球迷有晒交代啦。
記者：曾冠輝
攝影：林栢鈞