【本報訊】加盟7-11做老闆，表面上是個美好的創業夢，卻因母公司的苛刻條款，一間每月逾百萬營業額的便利店，加盟商或只得約3萬元月入落袋。條款包括若店舖入貨多於貨底總值但售貨量低，加盟商須向母公司繳還「欠款」兼罰息；光管壞了要換亦必須經母公司，索價數百元。有前加盟商批評：「7-11唔會餓死你，但亦唔會畀你發達。」
每間特許經營店與母公司就盈利的拆賬比例各異，表面上母公司約佔7成，加盟商佔3成，但有前加盟商指，母公司會透過計算手法影響加盟商分成，「每月營業額係80萬定100萬，都會計到你只能賺2萬幾3萬」。
7-11以往不會向加盟商透露貨品來貨價，加盟商無從控制利潤，直至去年12月競爭法實施後禁止合謀定價，加盟商方可查詢來貨價。惟加盟商一向只可經母公司入貨，他們質疑母公司低價買貨高價出售，變相從貨品供應及貨品銷售雙重賺錢。
換光管索價370元
加盟商阿達又指：「每間舖都有約20萬嘅貨底總值，係加盟時嘅投資金額，但如果某個月入貨多過呢個金額，而月尾結算前未賣出嗰堆貨，因為啲貨係7-11墊支，所以我哋要倒欠7-11，如果未及時還錢，仲要以P+2高息還息。」阿達稱此情況不時發生，批評政策令加盟商倒貼。
他續指，店內所有電器及工具損壞，只可經母公司維修，但維修價高於市價，「光管壞咗，幾年前收370蚊，包括買嘅成本、物流費同人工費，咁簡單嘅換光管都唔畀我哋自己換，變相又賺一筆」，他指如私下修理電器，母公司有權收回舖位。
7-11回覆稱，分店所有機器均屬母公司資產，因此有制度審核維修、機件供應商及產品均須合乎規格。根據協議，加盟商須負責機器維修費用，母公司則負責更換機器費用。
■記者梁佩珊