選舉臨近，真係乜都係話題，包括Ladies Night。話說法庭日前裁決，娛樂場所向女性收取低於男性顧客嘅入場費係性別歧視，噚晚11點，自由黨青年團主席李梓敬（圖）就決定喺夜場滿佈嘅中環蘭桂坊搞個「我要Ladies Night」遊行及簽名，以示抗議裁決，話要「凝聚市民支持優惠無罪」。
大家唔好笑住，自由黨真係好認真㗎，佢哋先喺皇后大道中嘅馬莎外集合，經德己立街圍繞蘭桂坊遊行一圈，相信吸引到唔少蒲精注意，之後喺德己立街一間健身中心外收集市民簽名。成班大隻佬做完gym梗係去附近酒吧嘅Ladies Night覓食，自由黨真係好有策略噃。