禮拜六沙田八草兩泥賽事，草地用C加3跑道作賽，睇番最近3月13日同一移欄賽事，內檔馬佔盡優勢，除了「神威敖翔」排七檔走外叠贏之外，其餘頭馬均抽一至五檔馬起步，其中「好好機會」、「駿馬名駒」及「狀元才」守前領馬之後貼欄包廂位建功外，另外，就算居中後上之「八心之煌」及「迫擊炮」亦係沿途貼欄慳位留力，故此宜秤先抽內檔之馬匹。
今戰列陣馬中，第七場「好好機會」正是於3月13日田C加3欄贏1800米，今次跑番同一移欄嘅贏馬路程，排檔理想可予重視。另外，第二場「飛來猛」兩次角逐田C加3欄均非冠即亞，抽埋一檔起步三甲機會甚大。
泥地方面，周末跑泥頗利前置，如「軍火」及「藍天堡馬」都係一放到底，頭場「快快贏」及第四場「紅旗飛將」等擅跑泥地之快放馬可優先留意。