Art Basel舉行期間，藝術B與太太入場參觀，只見人山人海，估唔到有咁多人次入場睇畫、買畫。藝術B從來唔識講錢，只講藝術，但見到一個畫廊展出油畫，人人睇完就走，竟然代人擔心，碰啱在畫廊兼職嘅女士係佢嘅學生，於是問吓：「你地駛唔駛蝕本㗎，聽講參展費都幾高昂嘅噃？」學生答：「B Sir，唔駛驚，美國老闆帶咗七、八張畫嚟，已經出售四張，有本有利嘅嘞，大把畫廊爭住加入香港Art Basel，梗係見到有利可圖先至年年旺場啦，蝕本一兩次就冇人嚟㗎嘞。」
藝術B只識藝術，唔識搵數字，4月8日嘅「經濟日報」就有報導話國際畫廊都爭相來港，但荷李活道租金急升，畫廊搵地方唔係咁容易，但一間「當代唐人藝術中心」已簽約租用2017年落成嘅皇后大道中8號H Queen's一層5060平方呎，月租40萬元以上，可見得睇好香港藝術市場前景嘅，大有人在；Art Basel生意旺場，160萬美元，1000萬美元嘅畫作，好似文華酒店芝士餅賣得咁輕鬆，一間畫廊在藝展結束前已賣清貨物，老闆提前返回美國。佢地返到去講幾句，仲唔引到國際畫廊流口水，確定香港成為亞洲藝術品中心，繼紅酒中心之後，又為香港提供更多知識密集、較高薪職位！
做畫廊職員，非一般售貨員，要對藝術史、國際藝壇人物有一定認識至得。電台小花K每放假就盡量去遊博物館，參觀大畫家生前居所。佢話去年往巴黎近郊參觀莫奈住宅，好彩識揀時間，六月花卉盛開，莫奈故居內花園池塘嘅蓮花靚到不得了，小花K拍下不少圖片，用手機傳過嚟俾左丁山睇，真係睇到心郁郁，恨不得人在現場。小花K話現場有美中不足之處，就係強國人準新郎新娘有錢到巴黎影結婚相，又有文化到莫奈故居池塘影婚紗相，令到其他國家遊客為之側目。小花K跟住補充，五月至七月之莫奈畫展期間，原來有三個講座，欲知詳情，可上香港文化博物館網頁。莫奈做畫家，生前居然有「花園豪宅」，唔係「文窮而後工」噃，問吓藝術B，佢話梵高生前一世捱窮，莫奈曾經俾當時藝壇批評為不入流，但好彩賣到一啲畫，有錢買屋，長時間觀察池塘蓮花，於是畫出驚世之作「睡蓮」，如果係莫財嘅話，莫奈就可能冇心機從事「睡蓮」嘅創作咯。