港鐵（066）主席馬時亨今年喜事多。佢年初接任主席一職，首要爭取立法會通過高鐵超支撥款，結果真係監粗通過咗。舊年底傳出佢大女馬露明（Christine）有喜，噚日佢出席花旗財經新聞獎頒獎禮時就自爆：「7月份各位可以叫我做公公喇！」
馬時亨大女馬露明同老公劉仲恒結婚超過四年，馬時亨呢幾年成日被人問住幾時抱孫，其實大家都覺得馬時亨恨抱孫好耐。
難怪噚日馬時亨被人問佢成為港鐵主席之後，仲有冇時間「馬拉松」（夥拍梁錦松選特首），佢即刻心情勁靚咁話，自己都好想升呢，「但唔係選乜乜，係想做公公！」佢7月榮升外公，可以弄孫為樂，所以一定冇時間搞馬拉松咁話。
至於寶貝孫改乜名，佢就耍手擰頭，話要留番畀BB嘅父母決定。無所謂喇，叫阿B定妹豬，馬時亨都一樣錫到燶。恭喜恭喜！