成日被人當做特首黑馬嘅行會成員陳智思噚日相當風騷，講到𠵱家開唔開心，佢竟然爆出一句「Thank God」，話慶幸2014年卸任嶺南大學校董會主席，唔使佢應付近年種種風波，總之「逢有鑊發生而我唔使孭，我都好開心」。
至於有冇興趣做其他大學校董，佢立即拋出一句「唔使客氣」，認真係真情流露。佢解釋，喺嶺大已經工作15年，乜都夠晒喎。
講完大學校董唔好做，佢興之所致，講埋立法會議員一職，話每次喺電視見到，接替佢做保險界立法會議員嘅陳健波，就覺得自己離開立法會嘅時間非常合適。
老實講，𠵱家好多中環人都話，邊個行埋現屆政府度，都冇乜運行，遠嘅唔講，平機會新任主席陳章明最近引來連番風波已經可見一斑，有時公職都唔係咁好做，最重要係幫邊個做。