香港第一家庭風波不絕，作為香港人，當然搖頭嘆息，但如果係建制派，理應跟阿爺大隊撐到底，點知有讀者向八方報料，話有建制派立法會議員作反，近日喺黃大仙同觀塘等區域，掛上寫有「香港須改，特首要變」（圖）橫額喎。
到底邊個咁大膽、唔怕中西環照肺？咪就係不時同特區政府唱反調嘅謝偉俊囉，佢呢個九東立法會議員，雖則喺唔少議題上同建制派分道揚鑣，例如撐港視發牌，之不過佢被視為西環契仔，掛張疑似踢走梁振英嘅橫額，會唔會惹嚟西環微言呢？八方都問過謝偉俊，橫額上八字真言係咪力爭換特首先？佢大賣關子話：「你自己領悟下！」「Time lies. See why」後，八方又多一個難題。八方又發現謝偉俊最近喺網台謎米開咪主持新節目《法乎情》，唔知有冇乜玄機？