終於開齋！南華噚晚喺旺角大球場嘅亞協盃G組迎戰馬爾代夫嘅馬茲亞，憑羅曉聰同陳肇麒上半場嘅入波，以2:0擊敗對手，今屆連輸三場後終於識贏波，總算冇令1,254位冒雨入場支持嘅球迷失望。
賽前喺亞協一分都未有嘅南華，要保持出線希望，呢場非勝不可。雖然澳洲射手賴恩格菲斯因病缺陣，但擔正嘅小將林學曦同羅曉聰表現冇令大家失望。其中羅曉聰喺左路表現活躍，雖然15分鐘窄位起腳斜出，但35分鐘就把握客隊門將穆罕默德拍出個波唔遠，輕鬆射入空門，幫球隊開紀錄。42分鐘，陳肇麒仲接應車潤秋嘅手榴彈，轉身射個靚波，幫南華半場領先2:0。
下半場雨勢越來越大，南華繼續強攻，但運氣就差啲。51分鐘，林學曦接應傳中禁區頂撞射，可惜中楣彈出；七分鐘後，佢頭槌攻門又中柱，慘成「柱男」！不過，南華總算保住2:0勝局，全取三分，雖然仲排緊榜尾，但叫做保住出線希望。同組另一場仰光聯主場同莫亨巴根踢成1:1，後者以10分繼續排榜首。