白只憑電影《踏血尋梅》喺金像獎同金馬獎奪最佳男配角獎起雙飛，由舞台劇演員捱出頭嘅佢力撐本土電影，獲獎後接拍嘅首部新戲《今晚打喪屍》，就係由本地作家余兒同名小說改編，將有本土特色嘅人地事加入喪屍災難內，白只喺戲中處男擔正做男主角，顏卓靈就做女主角。
《今晚打喪屍》由有份執導《打擂台》嘅鄭思傑監製，大部份內容係只有香港人先識得笑嘅gag位，戲中怨氣最大嘅係苛索1,500蚊人情嘅屍新娘，白只同張繼聰扮演戲劇學院幕後道具人員，合力炮製獨門道具喪屍血滴子、鴛鴦雞蛋仔、摺凳旋風斬打喪屍，殺出西營盤，白只更為愛情勇闖屍（西）環！
支持導演創作
白只噚日喺電話度話：「我都係拍本地電影俾大家賞識，香港要有屬於香港嘅製作，本地製作無論電影、舞台劇都有好多出色人才，只係未遇上好機會，所以只要係本地製作又適合演出，我必定力撐。呢部係喜劇，希望可以令香港有快樂同正面能量。」白只好開心同好友張繼聰合作，佢話：「我同阿聰已經係屋企人，由讀書到𠵱家，好感恩互相支持，今次同佢合作係好正。」
撰文：馮仁昭
