是時候交配嘅……又點止大熊貓盈盈樂樂？香港導盲犬服務中心其中兩隻負責繁殖嘅導盲犬，早排自然交配失敗，所以中心首次試用人工授孕方式，成功繁殖一胎5隻、3男2女嘅導盲犬BB，佢哋上月13日已經出咗世！噚日滿月同大家見面，其中4隻遺傳咗爸爸媽媽嘅黑毛色，有一隻囡囡就隔代遺傳咗金毛色。
捐5萬蚊有得命名
5隻BB仲未有名，不過為咗紀念佢哋係人工繁殖（Artificial Insemination）出嚟，所以一定要用A字頭，只要你有錢，捐5萬蚊畀中心，就可以幫其中一隻改名了。
連埋呢5隻BB，中心目前已經有25隻導盲犬，其中8隻配對咗畀視障人士使用，5隻有待訓練，7隻係用嚟繁殖嘅種犬，中心主席張偉民引述國際導盲犬聯盟估計，本港有近1,700個視障人士需要導盲犬服務，但香港得少於50隻導盲犬，每個視障人士平均要等兩年先有狗狗。佢話人工授孕技術可以加速繁殖同服務供應，等更多視障人士受惠喎。中心職員去年仲特登去美國取經學人工授孕術，希望短期內成立精子庫幫手配種。
張偉民同八方講，中心只要培訓多兩隻導盲犬，就可以加入國際導盲犬聯盟，到時本土出產嘅人才同導盲犬，就會有國際資格認證啦。佢仲想今年內再多一胎導盲犬BB出世，唔知到時又會用乜嘢英文字頭去幫佢哋改名呢？
李八方
mailto:[email protected]