公民黨楊岳橋噚日現身立法會，俾廿幾個學生妹包圍，究竟發生乜事？原來入咗立法會僅一個多月嘅岳少，向一班香港真光書院嘅女學生獻出「第一次」，大家唔好會錯意，八方係講岳少帶隊參觀立法會嘅「第一次」。
岳少同八方講，噚日主要帶呢班中五女生參觀立法會內唔同設施，雖然有啲嘢立法會嘅講解員講得好過佢，但佢都有同學生講解立法會法案係乜，同埋立法會嘅功能。雖然岳少自己係公民黨成員，但佢強調喺導賞過程中，絕對唔會加入個人同政治意見，因為覺得自己係代表緊立法會。
八方野生捕獲岳少時，見成班女學生笑聲連連，岳少果然相當受女生歡迎，有人仲向岳少攞簽名留念，至於真光女生問佢乜嘢問題？岳少就話主要問佢做立法會議員同大律師有乜分別，又叫佢分享吓做議員感受，連岳少都自嘲，話咁大個人，都係第一次俾過咁多女學生圍實喎。