上星期香港好熱鬧，不少外國遊客來港參觀七人欖球賽，左丁山上到陸羽飲午茶，竟然見到有好多「哈佬」在座，少見也，一睇就知係七人欖球賽常客，識得摸上陸羽飲茶。餐飲M嘅老友記A亦自美國飛到，與兒子及兒子同居女友走上陸羽等餐飲M。左丁山笑老友M：「你今年慳番唔少啦，報紙報導香港酒店業叫苦，話入住率低晒，房價又減咗兩成，連七人欖球賽星期都有不少房間空置呀！」老友M話：「有冇搞錯呀，我四個月前訂房，在Crowne Plaza，房租同去年一樣，邊度有減到呀？」唔，可能係臨近4月9日，酒店房仍然有剩，先至減價箒啩？呢勻就係早起的雀吃不到肥蟲，老友A又話：「我睇唔到酒店入住率低噃，你地有八成幾入住率呀，美國酒店見到就流口水啦。」正是由奢入儉難，過往幾年慣咗九成以上入住率咯喎，跌到八成多啲，酒店老闆就會喊嘅嘞。
趁住欖球賽期，前星期有藝術展覽周，Art Central、Art Basel、拍賣會，上個星期又有瑞信投資論壇、團結基金辦地區經濟合作論壇，請亞洲投資銀行行長金立群做演講嘉賓，今個星期五（4月15日）就輪到陳方安生、詹德隆等人新成立嘅Project Citizens Foundation舉辦一個「星級論題」What makes Hong Kong an International Financial Centre?由早上九時半至十二時四十五分在金鐘亞洲協會舉行，講者夠晒巴閉，有財政司司長曾俊華、中大校董梁定邦大律師、惠理基金主席謝清海拿督、滙控主席歐智華、AIA友邦CEO Mark Tucker，論壇主持人係金融時報亞洲編輯Jamil Anderlini，陣容夠鼎盛啩？聽講入場費每位五百元，亞洲協會大廳頂多坐三百人，應該好易爆滿。大記者自新聞界被退休後就俾一啲大人物搵佢做私人公關顧問，人客好少啫，但貴精不貴多，位位有頭有面，佢打電話嚟講有位大客捧場，買咗近30張門券，叫大記者派俾有心人，最好係MBA學生與大學生，等年青人有機會出席呢啲「大人物論壇」，見識吓。大記者話明益左丁山，送兩張飛嚟，於是邀請自己嘅mentee參加，點知撞正大學考試，來不了，可惜也。大記者話唔緊要，大把人向佢搶免費入場券，兩日之內就派完咯。陳太、詹德隆人面夠，Project Citizens頭炮打得幾響。