谷草這晚有雨打水戰，開場前後都不斷落雨，結果賽果偏冷，頭兩場分別由8.4倍「飛霞」及7.5倍「超好玩」勝出。
到第三場四班1200米再杰啲，主角蘇偉賢馬房初出馬「夢幻仙子」1檔起步沿途走勢唔搶眼，末段卻於中叠一陣風咁冚過晒，三歲澳洲自購新馬在柏寶胯下首次出賽即贏，單Win及組合獨贏A3，分別派291及33.5元，二至四名順序係半冷門「爪皇烈焰」、落飛馬「薑餅人」及大冷門「中華壹號」，四重彩派34萬幾，杰過芝麻糊。
「夢幻仙子」同時係繼蘇廐「實力飛駒」後新一匹於谷草初出即勝馬，馬主馬廷雄係《東方》報業馬氏家族後人，之前養過的「夢寐以求」當年亦一出即贏。而今場賽後元彪、黃興桂有份拉頭馬。
蘇偉賢表示柏寶為「夢幻仙子」主操時，都知道此馬有質素，曾試谷閘熟習場地，由於今仗幸運地排一檔形勢有利，所以賽前有少許信心，但沒料到可以輕鬆取勝。蘇偉賢指「夢幻仙子」插四班52分起步有利，循序漸進部署可以殺上二班，亦可以應付1400米，但既然在1200米一出即勝，下仗仍會主攻1200米，希望再為馬主建功。