今屆英格蘭球員先生周三公佈最後六強，家陣喺英超排第一嘅李斯特城有三人入圍，分別係占美華迪（華Dee）、馬列斯同埋尼高路簡迪，其餘三個就分別係熱刺前鋒哈利卡尼、阿仙奴中場奧斯爾同韋斯咸中場皮耶；其中卡尼仲入圍埋最佳年輕球員，同隊友迪利阿里等爭奪殊榮。
雖則李城好有機會贏英超，不過佢哋冇因此而擺款。周二華Dee等人操練完揸車走嗰陣，見到門外有幾十個粉絲守候，於是停低幫球迷簽名同玩自拍。同時，有個賭仔喺李城奪冠賠率有5,001倍時買咗廿零鎊，如果李城奪冠佢會收13.3萬鎊（約147萬港元），但佢喺周二決定提早收錢，不過都有超過10萬鎊落袋。