曼城事先張揚唔要現任領隊比歷連尼，下季改以哥迪奧拿領軍，點知比歷連尼前晚帶領球隊喺歐聯八強次回合贏來訪嘅巴黎聖日耳門（PSG）1:0，總比數贏3:2，球會史上首次入歐聯四強；而PSG就破唔到宿命，連續四屆喺歐聯八強止步。
曼城中場奇雲迪布尼傷癒復出「弗」到漏，四場入三球，包括前晚入致勝球，令PSG前鋒伊巴謙莫域完全被比下去，曼城球迷仲唱歌笑佢係「蠟槍頭」安祖卡路爾，真係陰公豬。話時話，如果比歷連尼最終幫隊波捧埋歐聯，唔知曼城老細蒙蘇同埋班高層點落台呢？
雖然伊巴踢唔出身價，不過據聞有中超球會開出總值5,600萬鎊（約6.18億港元）嘅兩年合約，力邀佢今夏以自由身加盟。