由宋仲基、宋慧喬主演嘅韓國KBS人氣劇《太陽的後裔》噚晚播第15集，承接上一集，劉時鎮（宋仲基飾）同姜暮煙（宋慧喬飾）展開甜蜜拍拖生活，兩人雖然不時有小爭執，但依然甜蜜。
另一邊廂，徐大英（陳久飾）和尹明珠（金智媛飾）雖然分手，但依然深愛對方。雖然大英主動搵明珠食和頭飯，但最後因為分歧，不歡而散。
過咗一段時間，時鎮、大英等人要出一個長達3個月嘅任務，時鎮走之前仲同暮煙承諾會活着回來，但喺完成最後一個解救人質任務時，時鎮同大英中槍倒地，最後仲發生爆炸。時鎮嘅下屬最後搵唔到佢哋嘅屍體，只搵到軍牌，向司令官報告後，宣佈二人壯烈犧牲。
壯烈犧牲嘅消息，好快就 傳到暮煙同明珠耳邊，睇埋遺書之後，暮煙同明珠傷心欲絕。失去時鎮嘅暮煙繼續堅強生活，暮煙亦只顧寄情工作。直到遇到Daniel就決定去難民區做志願工作，暮煙仲去咗劉大尉出事嘅地方悼念，不過突然間對講機中傳嚟時鎮嘅聲音：「big boss呼叫」，之前傳畀時鎮嘅訊息突然全部變已讀，之後對講機再次傳嚟聲音：「美人轉身看一下，over」，時鎮從沙漠上慢慢步向暮煙，時鎮同暮煙講對不起，二人情深擁抱。