邊個話爸爸一定偏心仔女，碧桂園（2007）老闆楊國強就係例外，楊老闆兩位千金楊惠妍與細妹楊子莹雖然已經加入公司多年，但係佢哋並唔係最高人工嘅董事，最高薪嘅董事竟然係楊老闆個姪楊志成，舊年袋走1,374萬元人仔。
楊老闆呢個姪仔今年已經42歲，係楊國強兩個女嘅堂阿哥，佢早於1997年尾加入碧桂園，2006年底同楊惠妍一齊成為碧桂園執董。楊志成主要負責個別地產開發項目。
根據碧桂園最新年報，楊志成舊年總年薪1,374萬元人仔，較對上一年升近一倍，主要因為獲發742萬元人仔花紅，較對上一年多近三倍，佢因此成為最高薪董事。楊惠妍與楊子莹舊年年薪分別係603萬同403萬人仔，兩位繼續都係冇花紅，不過兩位係太子女，花紅都係錦上添花㗎啫。