睇《跟着矛盾去旅行》，見長毛與主席好sweet地派聖誕禮物畀波蘭低下階層，他們看到人家屋企尚算寬敞，慨嘆如去香港劏房戶探訪，應該根本塞唔落咁多crew。幾乎喊咗出來，葡萄好酸。
剛才朋友傳來「迷你公寓」的相片，眼淚幾乎把多次被抽乾的太平洋填返滿，好感動啊！60呎雙人公寓月租$5,000，佈置實在有格調，4呎雙人床上有花花枕頭，房內還綴有鮮花、蠟燭。
這裏是赤柱，這裏是赤柱，這裏是赤柱，重要到爭啲想講30次，對，是西人聚居的臨海高尚住宅區。「迷你公寓」的facebook寫道：「不要白活一場，就算囊中羞澀，也可以精打細算地去自己想去的地方，過自己想過的模式！赤柱是一個充溢著異國風味的地方，來到這裡，您可能有種身在西方國家的感覺！」人食好西，你住好西，住劏房住出西方國家感，香港真係神奇頂級超卓。租住這裏甚麼都有，有水有電有wifi，只係冇走動空間，又如何？反正你OT完返歸都係瞓箒！「身旁的她，更能全程陪伴你左右。」呢句宣傳語正呀喂。你同另一半可以糖黐豆咁，新婚首選！諗諗下，真係覺得幾美好，窮人恩物，謝天謝地，我找到了。
「千祈唔好慣」，「千祈唔好慣」，「千祈唔好慣」，廖啟智你做乜撲出來講嘢，《十年》？駛乜十年，慣晒啦。晚晚硬直瞓棺材房，正常㗎！＃曲線要講明
記者：葉青霞
