王維基（Ricky）旗下港視（1137）舊年蝕咗超過8億元，認真慘慘豬。由於仍未獲發免費電視牌照，港視惟有繼續力谷網購，公司噚日公佈最新年報，封面大大隻字寫住「購物攻略」，好似成本shopping guide咁，仲有教大家點賺取Mall Dollar㖭。
唔知王太使唔使賺啲Mall Dollar去慳番啲家用呢？事關Ricky帶頭減人工。據年報顯示，Ricky年薪由2014年嘅過千萬元，舊年大減至473萬元，減幅超過54%，而整個港視董事局均減人工，整體薪金由2,883萬元，減至1,438萬元，全部董事冇花紅。
不過Ricky都算係良心老闆，因為港視嘅員工舊年仍然有得加人工，加幅同通脹差不多，仲有至少一個月花紅。記得Ricky講過，佢由做電訊到電視年代，每年都有加人工同最少一個月花紅畀員工，希望其他老闆共勉。