網上宣傳最忌hard sell，友邦香港似乎越嚟越明白呢個道理，繼之前請郭富城拍「阿爸載女環台」嘅感動故事後，再改編保齡球神童胡兆康父子情故事，拍成微電影，並搵來廖啟智（智叔）飾演父親一角，成功賺到一班毒舌網民熱淚。
保齡球神童胡兆康同父親感情深厚，細細個一齊打波，好快嶄露頭角，但2008年父親患癌過世，對於佢嚟講係相當大打擊，直到2014年自己都患癌，依然努力比賽，仲彷彿聽到父親嘅鼓勵，最終贏出。
其實成套微電影嘅最終目的，當然係sell人買保險，不過高手嘅地方，係片中冇叫人買保險，只sell感人情節，睇完都會到呢間公司有啲好感。
記得前年友邦高層拍咗段rap嘅MV，大唱「Who is the best is AIA」，hit rate唔錯，但就笑死街坊，𠵱家正正經經請好演員拍微電影咪好囉。