45歲的莫文蔚(Karen)，去年9月開始橫跨近一年的世界巡迴演唱會，由亞洲唱到今個月啟航的澳紐、歐洲、美加，越唱越愛。懷着好奇心繼續探索，「我知自己有朝一日會搞一個musical，華人市場有自己嘅百老匯，係我終極嘅目標！」
採訪：林妙萍
攝影：郭賢興
造型：林嘉慈
化妝：Kerry of Zing the make up school
髮型：Derrick Ng of Queens Private i
莫文蔚入行20多年，演唱會紀錄的數字也十分驚人，她是內地開過最多場次(超過50場）的香港女歌手，今個月又成為首位華人在米蘭、馬德里舉行演唱會。
跟住興奮去巡唱
Karen的「看看」世界巡迴演唱會，由去年9月開始，唱到歐洲、美加、橫跨近一年，米蘭及馬德里站，「我唱咗廿幾年歌，今次係第一次一個完整嘅world tour，所以每個地方都期待已久，最興奮係英國站！因為我細個喺嗰度讀書，老公又喺嗰度，係我第二個屋企咁；米蘭站都係，非常興奮，好榮幸。」
曾坦言計算請那位嘉賓、着多少套衫上台的日子已經過了，演唱會對Karen來說，是真真正正去感受兩三小時的快樂與交流。最重要是保持好體力與狀態，「我會乖乖地cut好多辣嘢、甜嘢、煎炸嘢咁，咁多年都一樣，𠵱家就一定要夠瞓，因為湯水都可能難少少。」
回憶是黃色天空
開過無數次演唱會，至今最難忘，還是人生第一次，「當時喺一個戶外足球場搞，遇到颱風，橫風橫雨，係我第一場騷已經好緊張，仲要應付埋個天氣。」開騷前，幸運地變作毛毛雨，「我喺後台等出場時，聽到啲怪聲，嘶哩沙啦咁，好似好恐怖，一出到台，原來係大會派咗啲塑膠黃色雨衣畀歌迷，所有人着住雨褸，又坐得好埋，磨擦嗰啲膠就發出呢啲聲音，我真係聽到毛管戙晒，但又好震撼，因為係一片黃色人海，跟住有啲沙沙聲，少少雨，好正！」
提到音樂無比興奮，會五國語言、鋼琴、雙簧管、古箏都通曉，未來還有一個音樂夢待圓，「我知自己有朝一日會搞一個musical，除咗舞台上，仲會做一個電影版本，想做一個中文嘅，希望華人市場有自己嘅百老匯，係我終極目標！」
歐亞愛情大連線
莫文蔚2011年和德國初戀男友Johannes閃婚，兩人由17、18歲認識，重逢、結婚後又各有各忙，會齊齊放三個月假環遊世界，或者兩個月不見一面，外人不懂的相處方式，他倆自得其樂，「現代人lifestyle嘅模式係咁，各有各忙，唔係結咗婚就要放棄晒所有嘢，每日對住個老公，你依然可以有自己空間、事業。」一個在歐洲工作，一個以亞洲為基地，互相遷就平衡。「去年就吃力啲，因為開始tour，一直喺內地。今年run到去歐洲，係我老公地頭，到時佢就負責帶隊！」
Karen近年也愛上設計，新搞作與意牌RucoLine出聯乘波鞋，「𠵱家好興嘅內置增高波鞋係佢哋發明先，我着咗好多年，今次放咗自己鍾意嘅元素，閃閃bling bling，有花花圖案、幻彩令面咁，夏天開心啲。」
終生救熊事業
如果要幫「莫文蔚」加hashtag，一定要tag#拯救月熊 #黑熊保育 #亞洲動物基金等等，取締活熊取膽是她的另一個終生事業。「我希望月熊取膽呢樣嘢，係會變成歷史，完全終止，越早發生越好，我哋唔會放棄，直到變成歷史，先會停手。」決心投入一輩子的時間心血，Karen除了宣傳教育外，去年開始推出慈善時裝「SAVE ME拯救月熊系列」，幾百元的月熊衫，熊樣是真真實實的一隻熊，「第一季用了我隻熊『寶貝』，佢係明星嚟㗎！今季就輪到佢朋友Jasper，每一隻熊其實都有唔同個性，唔同樣、表情，好似講緊唔同嘅心底說話！」
更多精采時尚內容，盡在 http://add.appledaily.com 。