龍蝦母女大鬧機場單嘢，偉大嘅特首受到千夫所指，大家真係唔明白為人父母嘅苦心，叫得特首梗係有特權、特事特辦啦，唔係改呢個名做咩；而且喺香港，犯咗法又點喎，僭建收回佣都冇事，就算龍蝦女帶白粉，或者真係俾恐怖份子偷龍轉鳳，將計時炸彈放落手袋然後引爆客機，特首都唔會有事。
其實做領隊有時好似做人阿爸阿媽咁辛苦，遇着啲年輕球員唔生性，好似「阿士東維拉周柏豪」基亞利殊咁食水煙，領隊重罰佢又驚佢走，罰得輕又驚其他球員有樣學樣。唔好以為帶豪門就乜事都冇，做曼城領隊都唔易，好似耶耶托尼咁，就快33歲人，但一樣玻璃心，隊友唔同佢慶祝生日又嬲，入波唔同佢擁抱又嬲，最近又發老脾，球會一係畀三年約佢，一係就今季買斷合約等佢離隊，好彩比歷連尼做埋今季就唔撈，爛攤子等哥迪奧拿接手。
同樣係今季未完已經宣佈下季領隊人選，曼城比車路士更加尷尬，萬一hea踢隨時冇前四，到下季哥帥（圖）上任冇歐聯踢就真係冇癮。但講真，曼城比車路士更多冗員，球隊老化問題更嚴重，之前傳過哥帥上任後要買八名球員，包括門將、兩個中堅、防中、翼鋒、阿古路嘅替補等等，但歐洲足協限制球會薪酬架構咁嚴，曼城要先放走唔少瘀血。小弟就唔係好信費蘭度法蘭斯高、文加拉呢啲平庸球員可以賣到幾多錢，哥帥呢個爸爸真係唔易做。
文：牽牛